Shauku ya kila mwanadamu ni kuwa na maisha mazuri, ya utele na amani wakati wote. Kwa bahati mbaya maisha ya mwanadamu yamekuwa na changamoto nyingi ambazo zimemfanya mwanadamu kuchanganyikiwa na kuanza kukimbizana na kila kitu ili kupata anachohitaji. Kila mwanadamu kwenye dunia hii aliumbwa kwa sura na mfano wa Mungu (Mwanzo 1:26-27). Kila mwanadamu aliumbwa baada ya vitu vyake yaani, Mungu aliumba kila kitu kwa ajili ya mwanadamu kabla ya kumumba mwanadamu. Mwanadamu alipewa kutawala vitu vyote, aliweza kupata chochote wakati wowote alipokihitaji. Lakini aliposhindwa kutii neno la Mungu alinyang'anywa vyote, akafukuzwa nje ya bustani ya Edeni na akalaaniwa kuwa kwa jasho atakula (Mwanzo 3:19). Tangu wakati huo mwanadamu amekuwa na nyakati ngumu kuyakabili maisha.

Mwandishi wa kitabu hiki amefafanua aina kuu tatu za nyakati katika maisha ya mwanadamu. Nyakati hizo ni (1) wakati wa mtu binafsi na dunia yake, (2) wakati wa shughuli za mtu duniani (3) wakati wa dunia yote. Nyakati hizi zinaathiri maisha ya mtu katika harakati zake za kuyatafuta mafanikio.Mwandishi amefafanua kwa kina maana ya nyakati zote tatu katika maisha ya mwanadamu katika harakati zake za kuyatafuta mafanikio katika sura nne za mwanzo za kitabu hiki. Katika sura ya tano, mwadishi amefafanua kwa kina mbinu anazotumia Shetani ili kuwafelisha watu kufikia maono yao au ndoto zao. Sura ya sita mwandishi ameeleza kwa kina namna ya kumshinda shetani na hila zake. Sura ya Saba mwandishi ametoa ushuhuda wa maisha yake binafsi kudhihirisha kwa vitendo jinsi nyakati katika maisha ya mwanadamu zinavyoweza kumpa changamoto na kwamba mwisho wa nyakati zote Mungu atakupa mafanikio unayoyataka.

Usikimbizane na maisha, utaumia. Mtume Paulo alionya katika waraka wake kwa Timotheo akisema, "Maana shina moja la mabaya ya kila namna ni kupenda fedha; ambayo wengine hali wakiitamani hiyo wamefarakana na Imani, na kujichoma kwa maumivu mengi." 1 Timotheo 6:10. Mfalme Sulemani aliyepewa kujua kila wakati katika dunia na makusudi yake anasema, "Kila kitu amekifanya kizuri kwa wakati wake; tena ameiweka hiyo milele ndani ya mioyo yao;" Mhubiri 3:11a.

Fuatana na mwandishi wa kitabu hiki hatua kwa hatua nawe utajifunza namna gani ya kuyakabili maisha katika nyakati hizi za mwisho zenye changamoto nyingi za mabadiliko ya hali ya hewa, vita, magonjwa ya milipuko kama vile Covid-19 zinazopelekea mdororo wa kiuchumi unaoathiri mpaka nchi zenye uchumi mkubwa kama vile China, Marekani na nchi zote za magharibi. Mungu ameweka wakati sahihi wa wewe kufanikiwa, mwamini Mungu (Waebrania 11:1, 6) nawe utakuwa na mwisho mwema (Yeremia 29:11).