Imajine w te fèt nan yon paradi, Ewopeyen sivilize yo te vin transfòme an yon lanfè. M ap pale de on ti bout tè, AyTi, nan mitan yon gran basen dlo, anvayisè yo te rive pataje an de. Yon ti bit tè zansèt vanyan nou yo - fanm kou gason (oprese yo) tout koulè - te sakrifye lavi yo kite pou nou an eritaj. Se te grasa tèt kole yo te fè ki te pèmèt yo ba nou yon espas kote nou te mèt tèt nou, Ayiti!
Imajine: trèt, vandè peyi, fo nasyonalis, anbisye, ti grangou, ti visye, yon bann ak yon pakèt enkonsyan ti soufrisken; yo tout ap konplote san panse kont enterè pwòp peyi yo. Pou Ayisyen sa yo, yon gouvènman se tankou yon chemiz: mete jodi; chanje denmen. Gen nan elekte yo (mwen pa ekri elektè) menm ki panse peyi a se jaden papa yo. Kidonk, enterè pa yo se pòch yo !
Kit se gouvènman an, kit se pèp la, an jeneral (Tout klas moun san eksepsyon), youn pa vrèman konn wòl li. Mouvman inyon ki te etabli yo kòm pèp souvren an disparèt, e y ap viv nan yon hing-hang etènèl. Se toujou youn lonje dwèt sou lòt. Twò souvan, Ayisyen an pa janm vle pran responsablite li. Se toujou fòt yon lòt . . ., se pa janm fòt li. Politisyen ayisyen an se yon konesè konplekse, sipèstisye ki anbrase tout fo rezon, eksepte lavérité. Anrezime, li pa vrèman konprann anyen nan anyen: je pete klere!
Kounye a, imajine w anfas kolonn mechan sa yo, bann san pitye sa yo . . ., san matirite ! Imajine tout kapasite peyi a deyò, epi enkapasite menm andedan, li ap fè dega. Kidonk, se grasa mantalite frivòl sa yo tou nou, ki tounen Dyaspora, pèdi yon peyi !
Imajine w ap panse sou tout move kòz sa yo ki kenbe ti paradi w la yon lanfè. Epi, panse w yo transfòme an yon zwazo ki kapab vole sou tèt Ayiti epi gade vérité yo anba. Imajine w ap viv yon kochma nan je klè, dlo nan je - Malfini-Byenfini!
